Natasha Martina – Phelipa
Despues di komprondé e sistema, e patronchinan i kon nan ta reflehá den nos bida, e pregunta natural ta: Kon nos por kibra e kadena?
- Kuminsa ku konsientisashon: Bo por kambia un patronchi solamente ora bo rekonosé esaki. No bisa: “esaki ta fout”. Pero bisa: “mi a siña esaki.” E momento ey ta habri un espasio pa kambio.
- Rekonosé pa por move. Den trabou sistemátiko nos ta siña ku loke bo ta kondená, ta keda. Loke bo ta rekonose, por move. Pa esaki, bo tin ku rekonosé e funshon, e doló i e sobrebibensia.
- Tuma bo posishon: Historia ta splika bo komportashon, pero e no ta hustifiká esaki pa semper.
- Redefiní poder: Poder no mester ta negativo. Poder por nifiká: responsabilidat, servisio, ehèmpel, igualdat.
- Kambia bo idioma interno: Stòp di bisa: “asina nos ta” óf “nos no por”. Kuminsá bisa: “nos ta siñando”, “nos ta kresiendo”, “nos ta konstrui
Reflekshon
- Kwa patronchi bo ta kla pa laga bai?
- Unda bo por kuminsá hasi un eskoho diferente?
Unchained ta nifiká: bo ta honra di unda bo ta bini, i bo ta skohe kon bo kier sigui.
Bob Harms: e doló ta bai stop ku AMI
Pensamentu:
Tin patronchinan ku a biaha atraves di oséanonan. Patronchinan formá bou di dominio, humiashon, privashon i deshumanisashon. Algun a bira kódigonan di sobrebibensia. Algun a kombertí nan mes den silensio. Algun a bira deskonfiansa entre ami ku mi próhimo.
Ami no a inventá nan. Pero awor mi ta konsiente di nan. Desenkadená no ta nifika rebeldia kontra mi liña ansestral. E ta nifiká ami haña kontròl riba dje. Ta yega un momentu den kada generashon ku un hende ta proklama “ E doló aki ta bai stòp ku AMI”! No den rabia. No den negashon. Sino den konsientisashon sobrio.
Reflekshon:
Ki patronchi bieu den bo liña ansestral bo ta sinti ku mester para ku abo?
Orashon Reflektivo:
“Testigo Eterno di nos historia,
Abo ku a mira e barkunan,
Abo ku a tende e gritunan di doló,
Abo ku a laga rosea kore dor di sistemanan kibra,
Si un patronchi di doló i amargura a keda eksistí ainda serka mi, duna mi e forsa pa laga esaki kaba ku dignidat.
Pa awe, mañan i semper!
No pa medio di odio propio.
No pa medio di nenga di unda mi ta bini.
Pero pa medio di transformashon konsiente.
Kaminda miedu a bira lei, establesé kurashi.
Kaminda silensio a bira siguridat, establesé amor berdadero.
Kaminda deskonfiansa a bira herensia, establesé disernimentu ankrá den dignidat.
Laga ami ta un punto di kambio, no un kontinuashon.”
Tarea:
Keda ketu pa un ratu. Laga vibrashon di e reflekshon aki trankilisá kada sla di bo kurason, kada airu kudrenta i sali di bo nanishi.